«Қылмыссыз жарқын болашақ»
Кешегі 2 сентябрь күні Президентіміз Қ.К.Тоқаевтың Қазақстан халқына жолдауында білім беру сапасын жақсарту жолында жас ұрпақтың кемелді болашағы үшін көптеген міндеттер, тапсырмалар жүктегені бәрімізге белгілі. Осы мақсатты көздей білген мектеп басшымыз Ғалымжан Бауыржанұлы кешегі аптаның сенбі күні мектебіміздің барша ата-аналар комитетін жиып, «Қылмыссыз жарқын болашақ» тақырып аясында көкейтесті мәселелерді талқыға салды. Мектеп басшымыз өз сөзінде:«Мектеп қабырғасында жүрген, қолымызда тәлім-тәрбие алып жатқан әрбір жас буын ұрпақ тағдыры біз, ұстаздарды алаңдататынын жасыра алмаймыз. Олардың бойына жақсы қасиеттерді сіңіріп, керісінше жаман әдет-қылықтардан алыс жүруге бағыттау ата-анамен қатар бізге де үлкен міндет»,- деп өте құнды ой тастай өтті. Ал, ата-аналар тарапынан келісімді ойлар да байқалды. Өздерін толғандырған қаншама сұрақтарын бағыттап, тұшымды жауаптарын да алып жатты.
Жиын соңында, тал бесіктен бастау алар бала тәрбиесіне енжар қарамай, оларды қисыны қиын қылмыс әлемінен, зорлық-замбылықтан алыс ұстауға екі жақтап жұмыс жасай білсек, біз өсіріп, бағып, күтіп, баптап отырған жас шыбығымыз түзу өсетінін, тамыры тереңде, жапырағы жайқалған ертеңгі жемісіміз болары анық деп айтып кетті мектеп басшысы Ғалымжан Бауыржанұлы.