«Жаңа дәуір мектебі. Алғашқы қадамдар...»
2018 жылдың 28 ноябрь күні №129 жалпы орта білім беретін мектебінде №72 жалпы орта білім беретін мектебімен құрылған желілік қоғамдастық аясында «Жаңа дәуір мектебі. Алғашқы қадамдар...» тақырыбында Қалалық білім басқармасының қолдауымен қалалық семинар өткізілді. Семинардың мақсаты – оқыту процесіндегі сыни тұрғыда ойлау әдістерін сабақта пайдалану, тәжірибені өзгерту мақсатында қоғамдастық аясында ынтымақтастық мәдениетін орнату, бөлінген көшбасшылықты тиімді қолдану болатын. Айта кететін жәйт, аталмыш қалалық семинардың өтуіне 2018 жылдың 25-26 октябрь күндері Астана қаласында Назарбаев университетінде «Назарбаев Зияткерлік мектептері» дербес білім беру ұйымының 10 жылдығына арналған «Жаңа дәуірдің мектебі» Х – Халықаралық ғылыми-тәжірибелік конференциясына №129 жалпы орта білім беретін мектебінің директоры Г.Б.Алматов пен №72 жалпы орта білім беретін мектебінің директоры А.М.Ахметбаевтың қатысуы себепші болды. Себебі, Елордада өткен конференцияның маңызы зор, білім жүйесіндегі өзгерістер, мұғалімдерді оқыту, кәсіби дамыту тағы сол сияқты конференцияның идеяларын насихаттау мақсатында екі мектеп мұғалімдері озық іс-тәжірибелерімен бөлісті. Семинарға Шымкент қаласы мектептерінің мектеп басшылары, директордың оқу-әдістеме жұмысы жөніндегі орынбасарлары мен пән мұғалімдері шақырылды. Семинарды ашып беруде сөз алған қалалық білім басқармасының басшысы А.Абылайхан оқушылардың білімге деген ұмтылысына тәнті болып, мектеп тынысымен танысып, өзінің оң бағасын берді. Семинардың ұйымдастыру бөліміндегі екі мектептің мерекелік тартуының жалғасы №72 жалпы орта білім беретін мектебінің директордың ғылыми-әдістемелік жұмысы жөніндегі орынбасары Э.Б.Қантаеваның «Жаңа дәуір мектебі» және «Оқыту мен оқудағы бөлінген көшбасшылықты ұйымдастыру» тақырыбындағы №129 жалпы орта білім беретін мектебінің директордың ғылыми-әдістеме жұмыстары жөніндегі орынбасары А.Л.Жусупованың және «Жас ұлан» ұйымының баяндамаларымен жалғасты. Ауыз толтырып айтатын үлкен мәселе, TED форматында 10-сынып оқушысы Қараман Жұлдыз «Дүниеде жақсылық көп пе, жамандық көп пе?», 7-сынып оқушысы Тасқұлов Нұршат «Немқұрайлық неге әкеп соғады?», 9-сынып оқушысы Шорабек Жұлдыз «Маман иесі болу үшін қандай дайындық қажет?» тақырыптарында өз ойларымен бөлісіп, тұжырымдамаларын қалың көпшілікке салды. Семинар барысында сапалы білім берудегі озық тәжірибемен мектебіміздің үздік ұстаздары бөлісіп, шеберлік сынып, кіріктірілген сабақ,үш тілде сабақ беру, іс-әрекеттегі зерттеу және LESSON STUDY зерттеу сабақтары және коучинг -сессияларын көрсетті.
Бүгінгі мектептің басты міндеті – өзіндік ой-көзқарасын ашық айта алатын, өмірге бейім тұлға қалыптастыру болса, оған мұғалімнің шәкіртіне деген сүйіспеншілігі, оны тұлға ретінде бағалауы баланың адамдық қасиеттерінің дамуына басты кепіл болуды көздейді. Ойын еркін айтатын, сын тұрғысынан ойлануға бейім, интеллект қабілеті дамыған, қоғамдық өмірде өз орнын табатын жеке тұлғаны қалыптастыру мектеп мұғалімдері үшін үлкен жауапты іс. Осы қызметте осындай маңызы зор құндылықтарды насихаттау мақсатында өткізген қалалық семинарда тәжірибесімен бөліскен ұстаздар қауымына және ұйымдастырып, қолдау көрсеткен мектеп басшылылары А.М.Ахметбаев пен Г.Б.Алматовқа сапалы білім беруде талмай еңбек ете беруіне тілектес екенімізді айтқым келеді.