«Күз аруы-2019»

Шымкент қалалық білім басқармасына қарасты, Әл-Фараби ауданы №129 жалпы орта білім беретін мектебінде 2019-2020 оқу жылының тәрбие жоспарына сәйкес, 5-7 сынып оқушылары арасында «Күз аруы-2019» байқауы өткізілді. Байқаудың басты мақсаты - арулардың бойындағы мәдениеттілікті, рухани адамгершілікті, өнерге, білімге деген шығармашылық ізденістерін дамыту, жастар арасында ана тіліміздің дамуы мен жандануына үлес қосу, талантты жастарға қолдау көрсету, арулардың қазақ қызына тән инабаттылық, нәзіктік қасиеттерін, қолөнерге бейімділігін арттыру болып табылады. Бұл байқауға өнерлері өрге жүзген 10 үміткер аруларымыз қатысты. Байқау барысында қыздарымыз мың бұрала би билеп, тамылжыта ән шырқап, өз өнерлерін паш етті. Ал сән үлгісін көрсету барысында жапырақтан, гүлдерден жасалған өзіндік киім үлгісі көрермендерді таң тамаша етті. Байқау 5 кезеңнен тұрды: Таныстыру, Абайдың қара сөздерін мәнерлеп оқу, өз өнері, ас мәзірі және сән үлгісінің көрсетілімі. Аталған сайыс кезеңдері бойынша сынға түскен аруларымыздың өнерлеріне әділ қазы алқалары өз бағасын беріп, сайыс қорытындысы бойынша бас жүлдені-7 «Д» сынып оқушысы Мырзағали Сымбат, І орынды-5 «А» сынып оқушысы Идахан Гулназым, ІІ орынды-6 «Г» сынып оқушысы Сапарбай Әсел, ІІІ орынды-7 «А» сынып оқушысы Нұрлан Ғазиза иеленді. Сонымен қатар, өзге де қатысушы аруларымыз арнайы номинациялармен марапатталды. Қатысушы аруларымыздың ата-аналарына қолдау көрсеткені үшін мектеп әкімшілігі тарапынан өз алғысымызды білдіреміз.